فـــــــــــــــــــضــــــــــفـــــــــــــضــــ ـه

ياريت كل واحد فينا لما يكون حابب يكلم نفسه او يكلم اي حد مش موجود ادامه ..ياريت يلاقي مكان ثابت يتكلم فيه من غير ما حد يرد عليه او يقاطعه او يطلب منه توضيح او حتي يساله اي سؤال..مكان يتكلم فيه وبس..حتي من غير ما يكون منتظر رد..

انا هخصص المكان ده ليا ولكل واحد ممكن يشاركني نفس الفكره..ف اي لحظه او اي وقت هكون محتاج اتكلم هاجي هنا واتكلم..واللي عايز يتكلم يتكلم..



المشكله اني عارف ايه هيه مشكلتي الحاليه..لكني متاكد بردو اني مش ف ايدي حل او حتي محاوله للحل..
يمكن دلوقتي احاول انسي شويه..او اتجاهل احساسي وتفكيري شويه..
بس انا خايف لما افوق من الغيبوبه اللي هدخلها بمزاجي دي اني اتصدم او اني معرفش ارجع تاني زي الاول..بس فعلا نفسي اخد فتره هدنه..حتي لو هدنه وهميه..بس ارتاح شويه وابقي ارجع اكمل تاني..اكمل حياتي لو كانت لسه فيه عندي حياه..

الكل بيقول ان الحياه كلها دروس..وانا حاسس اني الفتره اللي فاتت من عمري اخدت دروس كتير ..كتير عليا..او علي شخصي..اكتر مما احتمل..نفسي اعيش شويه عشان استفيد من الدروس دي اللي اتعلمتها لكني ...افاجا بدروس تاني وتاني وتاني..عارف طبعا ان كل اللي بيعمله ربنا كويس..واكيد اكيد ان اللي ربنا اختارهولي هيكون احسن بكتير جدا من اللي انا اخترته لنفسي مهما كان..لكن انا حاسس اني مجهد..كاني لعبت ماتش ملاكمه وانضربت كتير اوي..هو ممكن حد يلعب وينضرب كتير اوي للدرجه دي؟؟؟ اكيد انا ماتدربتش كويس..اكيد لسه متعلمتش كفايه عشان افوز..لازم اتعلم تاني..

يمكن بعد فتره اقدر اقول انا اتعلمت ايه ومحتاج اتعلم ايه..يمكن يقدر لساني ينطق بيه..علي فكره..لو كنت اقدر انطق بيه مكنتش اخترت الحل السهل وهو اني اكتبه...ومازال النيل يجري..





من فتره كبيره ابقي حاسس اني مش عايز اخرج واصمم مخرجش..برغم المحاولات الكتير من اصحابي واللي قابلتها انا بطناش اكبر لكني بردو مش حاسس ان هو ده اللي كنت عايز اعمله..اكيد اكيد مكنتش عايز اخرج.لكن مش ده وبس اللي انا عايزه.يمكن كنت عايز ابقي لوحدي شويه وخلاص.يمكن مش عايز ابقي مع حد عشان كده بهرب من الخروج وف كل مره بفشل لكن انهرده نجحت اني ابقي لوحدي وبس.لكن ايه السبب اني بردو مش مرتاح..يمكن لاني لسه خارج نفسي....لسه عايز ابقي لوحدي اكتر من كده.برغم اني ف البيت لكني حاسس اني مش ف بيتي..مش لوحدي فعليا..يمكن لو بقيت لوحدي او حسيت بكده يمكن ساعتها اقدر افضفض واتكلم واعاتب نفسي بجد..يمكن..